#Gündəm

Məişət zorakılığından zərər çəkənlər üçün yeni yardım mərkəzlərinin akkreditasiyası keçiriləcək

May 18, 11:40 / Mənbə: Az.trend.az

Bakı. Trend:

Əmək və Əhalinin Sosial Müdafiəsi Nazirliyinin müvafiq əmrinə əsasən, Nazirliyin tabeliyindəki Sosial Xidmətlər Agentliyində yeni tərkibdə yaradılmış “Məişət zorakılığından zərər çəkmiş şəxslərə qeyri-dövlət yardım mərkəzlərinin akkreditasiyası Komissiyası”nın ilk iclası olub.

Nazirlikdən Trend-ə verilən məlumata görə, komissiyanın tərkibi əmək və əhalinin sosial müdafiəsi, ədliyyə, təhsil və daxili işlər, səhiyyə nazirliklərinin, Sosial Xidmətlər Agentliyinin, Ailə, Qadın və Uşaq Problemləri üzrə Dövlət Komitəsinin və müvafiq strukturların nümayəndələrindən ibarətdir.

Sosial Xidmətlər Agentliyinin sədri, Komissiyanın sədri Vüqar Behbudov iclasda bildirib ki, məişət zorakılığından zərər çəkmiş şəxslər üçün əvvəllər bir sıra qeyri-dövlət yardım mərkəzlərinin akkreditasiyası aparılsa da, onların sonrakı fəaliyyətinin necə olduğu, hazırda da həmin mərkəzlərin fəaliyyətinin hansı səviyyədə olduğu məlum deyil. Ona görə də yeni komissiya tərəfindən həmin qeyri-dövlət yardım mərkəzlərinin fəaliyyətinə davamlı nəzarət həyata keçiriləcək, yeni yaradılan mərkəzlər isə komissiya tərəfindən akkreditə olunacaq.

Qeyd olunub ki, qeyri-dövlət yardım mərkəzlərinin akkreditasiyası zamanı onların müvafiq təcrübəyə, maddi-texniki bazaya, peşəkar işçi potensialına malik olması əsas meyarlar kimi götürüləcək. Qeyri-dövlət yardım mərkəzləri akkreditə olunduqdan sonra onların sonrakı fəaliyyəti də diqqətdə saxlanacaq, məlumat mübadiləsi aparılacaq. Həmin mərkəzlərin gördüyü işlərlə bağlı hesabatlılığı olacaq.

Ümumilikdə həmin mərkəzlər məişət zorakılığından zərər çəkmiş şəxslərə dəstək işlərində Agentliklə qarşılıqlı əlaqəli şəraitdə fəaliyyət göstərəcəklər.

Xəbərin mənbəsi: Az.trend.az


info@deirvlon.com

dnews@deirvlon.com

+994 (50) 874 74 86

+994 (50) 730 38 13

Copyright © 2020 Deirvlon News. All rights are reserved.
Deirvlon Technologies.